Mahatat News
بين الظرف والقدر في حكايي
حبيّت احكيها لحالي عالمرايي
حكاية ظرف وقدر يا انسان
قراها رح تفيدك بالنهايي
حكاية عالم مش بس بلبنان
حكاية بتكون عالكل مخبّايي
تخايل حالك في عندك ايمان
وامك فوق راسك مصلّايي
وبشغلك ناجح وبالشغل فرحان
وحامل قضيتك وعم تهدي هدايي
مش اذي حدا ولا عندك طول لسان
وجهودك عم بتضوّي تضّوايي
ومش ناطر شفقة ولا ناطر الاحسان
وغير من ربّك ما بدّك حمايي
بتمرق بظرف ورح اعطيك هالبرهان
كيف الظرف بيخطّ الروايي
بتحسّ حالك بعالم النسيان
والعتمة مرتكبه بِحقّك جنايي
وبتحسّ القرف من حالتك قرفان
وانو خطوتك بعدها بالبدايي
وانو العداله مهاجره الميزان
والحق ما عاد في عندو رعايي
ظرف رح تمرقوا ما تيأس و تنهان
وعراف زرعك بعد بدّو سقايي
ولمّا القدر بتركيبة الاكوان
قدّام عيونك بيحبكلك روايي
ما تجرّب تنسحب من الميدان
وتقول هيدي آخرتي وجزايي
لانو لغيري حمّل الاوزان
وتعب غيري مش متل تعبي وشقايي
ما تتذمّر ولا تعيش العمر حردان
القدر مكتوب مش لعبه وهوايي
خلّي زندك صخر من صوّان
وخلّي عقلك فوق الكلّ رايي
وما توعى ولا مرّه الصبح يئسان
آمن بحلمك وقول الله كبير
وعدالة ربنا عالاكيد جايي…
